Нұрали алғаш рет айналасындағы әлемнің дыбыстарын 11 айлығында естіді. Бұған дейін оның өмірін толық үнсіздік қоршап тұрған еді. Ол дүниеге келгеннен бері естімейтін – ауыр сенсоневральды кереңдік оны анасының дауысы мен балалардың күлкісін есту мүмкіндігінен айырған.

Анасы Қарлығаш баласының тексерістері өте ерте басталғанын есіне алады. Алғашқы есту тесті 3 айлығында жасалса, 6 айлығында тереңдетілген зерттеу жүргізілді. Диагноз расталды. Дәрігерлер баланың жалғыз мүмкіндігі – кохлеарлық имплантация екенін айтты.

«Нұрали 11 айлығында алғашқы операциясын жасатты. Сол кезде біздің дәрігерлер бұл саланы енді ғана меңгеріп жатқан еді. Бізге жолымыз болды: Санкт-Петербургтен маман келіп, операция жасауға көмектесті, ал біздің дәрігерлер ассистент болды. Бір айдан кейін имплант қосылды, сол кезде ұлымның алғаш рет естігенін көрдім. Оның қуанышы мен үшін нағыз бақыт болды», – деп бөлісті Қарлығаш.

Имплант қосылғаннан кейін Нұралидің өмірінде жаңа кезең басталды. Ол даму орталығына барып, біртіндеп сөйлесуді және айналасындағы адамдармен қарым-қатынас жасауды үйрене бастады. Қазір ол 13 жаста, 8-сыныпта оқиды, сыныптастарымен белсенді араласып, болашақта одан да жақсы естуді армандайды.

Кохлеарлық имплантация – бұл жоғары технологиялық әдіс. №2 көпбейінді қалалық балалар ауруханасының оториноларингология бөлімінің меңгерушісі Абилев Арман Амангелдыұлы айтуынша, бұл – оториноларингология саласындағы ең күрделі әрі жауапты операциялардың бірі.

Қазақстанда мұндай операциялар ТМККК шеңберінде тегін жасалады және ауыр есту бұзылыстары бар балаларға толыққанды өмір сүру мүмкіндігін сыйлайды.